Autoritetet rregullatore të cannabis-it përballen me sfida të ngjashme pavarësisht ndryshimeve në legjislacion dhe organizim institucional. Pikërisht mbi këtë shkëmbim përvojash u ndërtua edicioni 2026 i “CANNRA External Stakeholder Meeting”, ku morën pjesë edhe përfaqësues të Agjencisë Kombëtare të Kontrollit të Cannabis-it, të kryesuar nga Drejtori i Përgjithshëm, znj. Anila Alliu.
Gjatë tre ditëve të aktivitetit, ekspertë dhe drejtues institucionesh nga Shtetet e Bashkuara, Kanadaja, Australia, Zelanda e Re dhe Shqipëria trajtuan çështje që lidhen me licencimin, mbikëqyrjen e tregut, laboratorët analitikë, sigurinë e produkteve dhe përdorimin e teknologjisë gjatë mbikëqyrjes.
Një pjesë e rëndësishme e diskutimeve iu kushtua përdorimit të të dhënave për identifikimin e parregullsive, monitorimin e laboratorëve dhe përmirësimin e proceseve vendimmarrëse. U prezantuan gjithashtu zhvillimet më të fundit në standardizimin e produkteve të cannabis-it dhe mekanizmat që përdoren për garantimin e transparencës në sektor.
Aktiviteti krijoi gjithashtu mundësi për takime me autoritete shtetërore të mbikëqyrjes së sektorit, universitete dhe kompani teknologjike që zhvillojnë sisteme për gjurmimin e produktit.
Për Shqipërinë, përvoja e vendeve që kanë ndërtuar prej vitesh sisteme funksionale rregullatore përbën një burim të rëndësishëm njohurish në procesin e zbatimit të Ligjit nr. 61/2023 dhe zbatimit të metodave të reja të kontrollit.
