Në datat 3–4 mars 2026, në Bruksel, Belgjikë, u zhvillua mbledhja e 17-të e Nënkomitetit të Stabilizim-Asociimit Bashkimi Evropian–Shqipëri për Kapitullin 24: “Drejtësia, Liria dhe Siguria”, në të cilën Agjencia u përfaqësua nga Drejtori i Përgjithshëm, znj. Anila Alliu.

Në fokus të diskutimeve ishte bashkëpunimi në fushën e drogave, me vëmendje të veçantë te sekuestrimet, asgjësimi dhe zbatimi i masave ndaj shkeljeve që mund të lidhen me kultivimin e ligjshëm të bimës së cannabis-it.

Për Agjencinë, ky takim ishte një mundësi për të paraqitur qasjen e Shqipërisë: zhvillimi i sektorit të cannabis-it për qëllime mjekësore dhe industriale nuk nënkupton hapje të pakontrolluar tregu, por ndërtimin e një sistemi shtetëror kontrolli, ku çdo aktivitet duhet të jetë i licencuar, i monitoruar dhe i gjurmueshëm.

Gjatë takimit u theksua rëndësia e:

• forcimit të kuadrit ligjor dhe institucional në vend;
• krijimit të mekanizmave efektivë të monitorimit dhe kontrollit;
• parandalimit të çdo devijimi nga aktiviteti i ligjshëm;
• zbatimit të masave të sekuestrimit dhe asgjësimit sipas standardeve evropiane.

Pjesëmarrja në këtë proces rikonfirmon angazhimin e Shqipërisë për të ndërtuar një model të kontrolluar, transparent dhe të besueshëm, në përputhje me kërkesat e integrimit evropian dhe me përgjegjësinë që kërkon një sektor i tillë i ndjeshëm.