Më datë 3 dhjetor 2024, Drejtoresha e Përgjithshme e Agjencisë Kombëtare të Kontrollit të Cannabis-it (AKKC), znj. Linda Pustina, zhvilloi një takim bilateral frytdhënës me Drejtoreshën e Përgjithshme të Departamentit të Kontrollit të Cannabis-it në Kaliforni (DCC), znj. Nicole Elliot, ku morën pjesë dhe përfaqësues nga të dy institucionet.

Gjatë këtij takimi, znj. Pustina dhe znj. Elliot shkëmbyen përvoja dhe mendime mbi praktikat më të mira në rregullimin dhe monitorimin e sektorit të cannabis-it. Znj. Pustina prezantoi një pasqyrë të detajuar mbi situatën aktuale në Shqipëri, duke përfshirë progresin e arritur deri më tani, sfidat dhe potencialet që ofron ky sektor, si dhe miratimin e ligjit të ri nr. 61/2023.

Znj. Pustina sqaroi rolin e AKKC në monitorimin e zbatimit të ligjit dhe sfidat thelbësore që duhen adresuar për krijimin e një sektori të qëndrueshëm, të mbështetur në ligjshmëri dhe transparencë. Në këtë kontekst, u theksua rëndësia e sistemeve të avancuara të gjurmimit për parandalimin e tregtisë së paligjshme dhe sigurimin e përputhshmërisë me standardet ndërkombëtare, duke ndërtuar një bazë të fortë për një industri të besueshme, të qëndrueshme dhe të rregulluar.

Në përmbyllje të takimit, të dyja palët u angazhuan për avancimin e bashkëpunimit të ndërsjellë në fushën e monitorimit të kultivimit dhe tregtimit të cannabis-it, duke shqyrtuar mundësitë për implementimin e teknologjive të avancuara dhe përmirësimin e kërkimeve shkencore ndërmjet universiteteve të Shqipërisë dhe Kalifornisë.