Drejtoresha e Përgjithshme e AKKC, znj. Linda Pustina, zhvilloi më datë 2 dhjetor 2024 një takim bilateral me Këshilltarin e Lartë të Agjencisë së Ushqimit dhe Barnave të SHBA- FDA, z. Norman Birenbaum. Takimi u fokusua në çështje të rëndësishme që lidhen me zbatimin e kritereve të licencimit, në përputhje me Ligjin nr. 61/2023, “Për kontrollin e kultivimit dhe përpunimit të bimës së cannabis-it dhe prodhimin e nënprodukteve të saj për qëllime mjekësore dhe industriale në Shqipëri” dhe implementimin e GMP-ve.

Diskutimet u përqendruan në plotësimin e kërkesave të detajuara dhe rigoroze që duhet të përmbushin subjektet që aplikojnë për licencë, me qëllim garantimin e përmbushjes së standardeve më të larta dhe kushteve të veçanta të përcaktuara në ligj si dhe aplikimin në nivel federal të standardeve dhe praktikave të mira të prodhimit.

Zoti Birenbaum shprehu gatishmërinë për të mbështetur AKKC-në në përballimin e sfidave, duke ndihmuar në sigurimin e përputhshmërisë me standardet ndërkombëtare dhe përshpejtimin e zhvillimit të një industrie të sigurt, të qëndrueshme dhe konkurruese në Shqipëri.

AKKC mbetet e angazhuar në ndjekjen dhe implementimin e praktikave më të mira ndërkombëtare, duke garantuar sigurinë dhe standardet e larta në prodhimin e cannabis-it mjekësor dhe industrial në Shqipëri.