Përfaqësues të Agjencisë Kombëtare të Kontrollit të Cannabis-it (AKKC), të kryesuar nga Drejtoresha e Përgjithshme znj. Linda Pustina, realizuan një vizitë në Laboratorin Referues të Qendrës për Kërkime Medicinale të Cannabis-it (CMCR) pranë Universitetit të Kalifornisë, San Diego, SHBA.
Gjatë kësaj vizite, delegacioni u njoh nga afër me teknologjitë më të avancuara dhe metodologjitë moderne të testimit, të cilat luajnë një rol thelbësor në garantimin e cilësisë dhe sigurisë së produkteve të cannabis-it mjekësor dhe industrial. Znj. Pustina theksoi rëndësinë e krijimit të partneriteteve ndërkombëtare dhe zhvillimit të projekteve të përbashkëta kërkimore me institucionet homologe në Shqipëri.
Drejtoresha e Laboratorit Referues, znj. Ray, shprehu gatishmërinë e saj për të ndarë eksperiencën dhe praktikat më të mira të laboratorit, si dhe garantoi ofrimin e mbështetjes së nevojshme për ngritjen e një laboratori të tillë në vendin tonë.
Gjithashtu, drejtori i CMCR dhe ekspertët e Laboratorit Referues ndanë përvojat e tyre mbi kushtet që një laborator duhet të plotësojë për të qenë në përputhje me kriteret ISO dhe standardet ndërkombëtare.
Kjo eksperiencë u vlerësua si shumë e rëndësishme, duke ofruar një model të qartë për ngritjen e Laboratorëve Referues sipas standardeve më të mira ndërkombëtare në vendin tonë, të cilët do të garantojnë cilësinë dhe zhvillimin e qëndrueshëm të sektorit.
