Drejtoresha e Përgjithshme e AKKC, Znj. Linda Pustina mori pjesë në takimin vjetor të Shoqatës së Rregullatorëve të Cannabis-it (CANNRA) të zhvilluar më datat 2-4 dhjetor 2024, në San Diego, Kaliforni. Në këtë event të rëndësishëm u diskutuan praktikat më të mira, sfidat dhe trendet e industrisë së cannabis-it, si dhe rregullat dhe standardet ndërkombëtare të zbatuara në 45 shtete të SHBA-së, Kanada, Hollandë dhe Maltë.

Me 270 pjesëmarrës të pranishëm nga e gjithë bota, AKKC u prezantua si anëtarja më e re e kësaj shoqate, duke shënuar një hap të rëndësishëm në forcimin e bashkëpunimit ndërkombëtar dhe zhvillimin e një sektori të qëndrueshëm dhe të rregulluar të cannabis-it në Shqipëri.

Ndër të tjera, ky takim trajtoi një sërë temash të lidhura me politikat federale të SHBA-së, Kanadasë dhe disa vendeve të tjera si dhe ndikimin e tyre në industrinë e cannabis-it, përfshirë sistemet e gjurmueshmërisë, standardet GMP, mekanizmat për sigurinë e produkteve, si dhe rëndësinë e databazave për shkëmbimin e të dhënave, të cilat mundësojnë përmirësimin e kuadrit rregullator dhe procesit të vendimmarrjes.

Pjesëmarrja në këtë takim të rëndësishëm shërbeu si një mundësi e vlefshme për t’u njohur me praktikat më të mira globale dhe për t’i integruar ato në procesin rregullator të Shqipërisë. Synimi ynë është ndërtimi i një modeli të sigurt, të suksesshëm dhe konkurrues në industrinë ndërkombëtare të kultivimit, përpunimit dhe prodhimit të cannabis-it për qëllime mjekësore dhe industriale.