Dokumentet duhet të dorëzohen deri më datë 12.03.2025, ora 16.00, në mënyrë elektronike në këtë link, si dhe me postë ose dorazi drejtuar:

Agjencisë Kombëtare të Kontrollit të Cannabis-it

Rruga “Ibrahim Rugova”, Pallati Sky Tower, kati 13, Tiranë, Shqipëri.

Për më shumë informacion mund të drejtoheni në adresën e e-mail: info@nacc.gov.al

Në mbështetje të pikës 2, të nenit 107, të Kushtetutës, të ligjit nr.7961, datë 12.7.1995, “Kodi i punës së Republikës së Shqipërisë”, të ndryshuar, të germës ë), të pikës 2, të nenit 9, të ligjit nr. 61/2023 “Për kontrollin e kultivimit dhe përpunimit të bimës së cannabis-it dhe prodhimit të nënprodukteve të saj për qëllime mjekësore dhe industriale”, Urdhrit nr.56, datë 5.4.2024, të Kryeministrit, “Për miratimin e strukturës dhe të organikës së Agjencisë Kombëtare të Kontrollit të Cannabis-it”, si dhe Udhëzimit të Përbashkët nr.274, datë 16.05.2024, “Për përcaktimin e procedurave, afateve, kritereve dhe dokumentacionin e nevojshëm për verifikimin e pastërtisë së figurës së punonjësve të Agjencisë Kombëtare të Kontrollit të Cannabis-it apo të subjekteve të licencuara apo të lejuara, si dhe të kritereve etiko-profesionale”, Agjencia Kombëtare e Kontrollit të Cannabis-it, në vijim Agjencia, shpall vendin vakant për pozicionin Koordinator (Financë) në Sektorin e Autorizimeve, Lejeve dhe Licencave, në Drejtorinë e Standardeve, Autorizimeve, Lejeve dhe Licencimit, në Agjencinë Kombëtare të Kontrollit të Cannabis-it, me kriteret si vijon:

A. Përshkrimi i përgjithshëm i punës:

• Vlerëson në tërësi aspektet financiare të aplikimeve për pajisje me leje për ushtrimin e aktiviteteve që lidhen me prodhimin e cannabis-it mjekësor ose industrial dhe monitoron këto aspekte në vijëmësi.
• Përgjegjës për hartimin dhe zbatimin e strategjisë së zhvillimit të Agjencisë nga pikëpamja financiare dhe për menaxhimin e fondeve në zbatim të kuadrit ligjor në fuqi.
• Drejton veprimtarinë administrative financiare, administrimin e fondeve buxhetore dhe kujdeset për përdorimin e fondeve në dispozicion të institucionit, fondin e pagave si dhe për të gjitha transaksionet e tjera financiare që lidhen me nevojat e brendshme të institucionit si dhe në marrëdhëniet me të tretët, në mënyrë ekonomike, eficente dhe efektive.

• Përgatit me kërkesë të nëpunësit zbatues dokumentacionin financiar si shkresa, urdhra, raporte financiare, si dhe çdo akt tjetër, në përputhje me parashikimet e kuadrit ligjor në fuqi.

• Përgatit dokumentin përfundimtar të buxhetit dhe bashkërendon punën gjatë procesit të përgatitjes së buxhetit të Agjencisë, në bashkëpunim me Nëpunësin Zbatues.
• Identifikon dhe krijon regjistrin e riskut, vlerësimin, kontrollin e risqeve që vënë në rrezik arritjen e objektivave dhe realizimin me sukses të veprimtarive dhe ia paraqet Drejtorit të Përgjithshëm.
• Përgatit projektin për detajimin e përdorimit të fondeve të Agjencisë dhe e paraqet nëpërmjet Nëpunësit Zbatues, për miratim tek Drejtori i Përgjithshëm.
• Zbaton buxhetin vjetor të Agjencisë dhe ndjek të gjitha lëvizjet e buxhetit, shtesa, pakësime gjatë vitit.
• Siguron mirëadministrimin e dokumentacionit financiar që krijohet gjatë vitit ushtrimor në përputhje me legjislacionin në fuqi.
• Harton listë-pagesat mujore të pagave të Agjencisë, listë-pagesat e sigurimeve shoqërore dhe shëndetësore, sigurimet suplementare, tatimin mbi pagën apo detyrime të tjera të kësaj natyre, duke respektuar afatet ligjore përkatëse.
• Përgatit urdhër shpenzimet dhe dokumentimin e të gjithë transaksioneve financiare të Agjencisë dhe i kalon tek Nëpunësi Zbatues për veprim.
• Llogarit dhe përgatit dokumentacionin lidhur me pagesat për shpenzimet e udhëtimit, dietat brenda dhe jashtë vendit, në përputhje me legjislacionin në fuqi.
• Evidenton shpenzimet mujore, përgatit situacionin mujor përmbledhës dhe rakordon me degën e thesarit.
• Kryen të gjitha veprimet përkatëse që tarifat e lëshimit të licencës për subjektet aplikuese të arkëtohen, parapaguhen para ofrimit të shërbimit nga Agjencia.
• Evidenton të ardhurat e realizuara dhe bën rakordimin me degën e thesarit;
• Regjistron dhe kontabilizon në mënyrë të plotë, të saktë dhe në kohë të gjitha transaksionet financiare të Agjencisë, si dhe përgatit pasqyrat financiare në përputhje me legjislacionin në fuqi.
• Përgatit dhe dërgon punonjësve, çdo muaj, skedën e pagës, ku përfshihen elementët e vlerës bruto dhe neto të pagës, vlera e kontributeve të paguara, zbritjet nga paga etj.
• I përgjigjet Nëpunësit Zbatues për detyrat që i ngarkon.
• Kryen edhe detyra të tjera të parashikuara në kuadrin ligjor në fuqi dhe/ose të ngarkuara nga eprorët/ Drejtori i Përgjithshëm.

B. Kushtet e përgjithshme që duhet të plotësojë kandidati për të aplikuar pranë Agjencisë janë:

1. Të jetë shtetas shqiptar;
2. Të ketë zotësi të plotë për të vepruar;
3. Të zotërojë gjuhën shqipe, të shkruar dhe të folur;
4. Të jetë në kushte shëndetësore që e lejojnë të kryejë detyrën përkatëse;
5. Të zotërojë diplomën universitare sipas Nivelit 7 të KSHK (Master i shkencave apo të barasvlefshme me të sipas legjislacionit të arsimit të lartë);
6. Të ketë përvojë pune jo më pak se 3 (tre) vjet në profesion;
7. Të ketë njohuri të mira të gjuhës angleze;
8. Të ketë njohuri të mirë të përdorimit të kompjuterit dhe të paktës microsoft;
9. Mos të jetë larguar nga puna me masë disiplinore, që nuk është shuar sipas legjislacionit në fuqi.

C. Kushtet që duhet të plotësojë kandidati për pastërtinë e figurës janë:

Të plotësojë kriteret e integritetit  moral, si pjesë e procesit të verifikimit të pastërtisë së figurës sipas Udhëzimit të Përbashkët nr.274, datë 16.05.2024, “Për përcaktimin e procedurave, afateve, kritereve dhe dokumentacionin e nevojshëm për verifikimin e pastërtisë së figurës së punonjësve të agjencisë Kombëtare të Kontrollit të Cannabis-it apo të subjekteve të licencuara apo të lejuara, si dhe të kritereve etiko-profesionale”.

D. Kriteret preferenciale për përzgjedhjen e kandidatit janë:

1. Në lidhje me fushën e kualifikimeve, kandidatët duhet të zotërojnë diplomë universitare në fushën e shkencave ekonomike, si dhe certifikata apo trajnime në lidhje me fushën e detyrave kryesore. Diploma e nivelit Bachelor duhet të jetë në të njëjtën fushë me diplomën e nivelit Master Shkencor.
2. Në lidhje me eksperiencën profesionale, kandidatët duhet të kenë përvojë pune në dy ose më shumë nga këto fusha:

• administratë publike;
• koordinim ndërinstitucional;
• procese pune që lidhen me financat, hartim zbatim buxheti, menaxhim i fondeve publike.

3. Preferohet të ketë njohuri të mira të një prej gjuhëve të tjera zyrtare (frëngjisht/ gjermanisht/ italisht/ spanjisht) të Bashkimit Evropian.

E. Kandidati duhet të ketë aftësi të spikatura për të:

1. 1. Koordinuar;
   2. Përcaktuar objektiva, vendosur prioritete dhe respektuar afatet;
   3. Planifikuar, rishikuar dhe drejtuar punën;
   4. Organizuar burimet, komunikuar dhe prezantuar;
   5. Analizuar dhe përshtatur metodat dhe procedurat e reja.

Gjithashtu kandidati duhet të ketë aftësi shumë të mira analize, vendimmarrjeje të shpejtë, komunikimi dhe prezantimi, si dhe fleksibilitet në pranimin e metodave dhe procedurave të reja.

Vlerësimi bëhet në bazë të:

1. Jetëshkrimit dhe përvojës së kandidatit në përputhje me detyrat kryesore të pozicionit dhe fushën e veprimtarisë së Agjencisë;
2. Përmbushjes së kritereve të veçanta etiko-profesionale për pozicionin e punës;
3. Intervistës/vlerësimit të njohurive dhe aftësive profesionale dhe kompetencave për pozicionin e kërkuar si dhe motvimin, aspiratat dhe pritshmëritë e tyre për karrierën.

Vetëm kandidatët e short-listuar që përmbushin kriteret sipas ndarjes B dhe D (1, 2) do të kontaktohen për intervistë nëpërmjet adresës elektronike postare.

Dokumentet që duhet të dorëzohen janë, si më poshtë vijon:

1. Kërkesë për aplikim;
2. Jetëshkrimi i plotësuar në format europass (shkarko);
3. Fotokopje e librezës së punës;
4. Vetëdeklarim për masat disiplinore, si dhe që nuk është larguar nga puna me masë disiplinore, që nuk është shuar sipas legjislacionit në fuqi (shkarko formularin);
5. Formularët sipas aneksit 1 dhe 2 të Udhëzimit të Përbashkët nr.274, datë 16.05.2024 (shkarko).
6. Formular të vetëdeklarimit (të plotësuar e të firmosur), në zbatim të ligjit nr.138/2015, “Për garantimin e integritetit të personave që zgjidhen, emërohen ose ushtrojnë funksione publike”, të ndryshuar; (shkarko fomularin) (shkarko cover) 
7. Fotokopje të kartës së identitetit ose të pasaportës;
8. Certifikata përkatësisht të gjendjes familjare/personale;
9. Certifikatë të gjendjes gjyqësore;
10. Fotokopje të noterizuar të diplomës së arsimit të lartë (diplomat në përfundim të studimeve të kryera jashtë vendit duhet të jenë të njohura dhe të njësuara sipas legjislacionit shqiptar nga ministria përgjegjëse për arsimin);
11. Dëshmia përkatëse për njohjen e gjuhës angleze (nëse aplikanti ka fituar një diplomë të një programi studimi të kryer në gjuhën angleze, diploma e fituar shërben si dëshmi për plotësimin e këtij kriteri).
12. Vërtetim të gjendjes shëndetësore;
13. Vërtetim nga prokuroria që vërteton se, nuk është në hetim për një vepër penale të kryer në fushën e narkotikëve, në fushën e pastrimit të parave, të financimit të terrorizmit apo të armëve të shkatërrimit në masë, për vepra që kanë lidhje me integritetin dhe figurën morale.
14. Vërtetim nga Struktura e Posaçme kundër Korrupsionit dhe Krimit të Organizuar që vërteton se, nuk është në hetim në fushën e narkotikëve, në fushën e pastrimit të parave, të financimit të terrorizmit apo të armëve të shkatërrimit në masë, për vepra që kanë lidhje me integritetin dhe figurën morale, për pjesëmarrje në grup të strukturuar kriminal apo krim të organizuar. (Nëse është e pamundur të merret vërtetimi brenda afatit të caktuar për dorëzimin e dokumentacionit në shpallje, aplikanti duhet ta dorëzojë në çdo rast përpara fillimit të marrëdhënieve të punës).
15. Çdo dokument tjetër, që vërteton kualifikimet, trajnimet, arsimin shtesë, vlerësimet pozitive apo të tjera të përmendura në jetëshkrim.

    Mosparaqitja e plotë e dokumenteve brenda afatit të caktuar dhe mënyrës së përcaktuar në këtë shpallje, sjell skualifikim të kandidatit.

     

    Inkurajojmë të gjithë të interesuarit që përmbushin kriteret, të aplikojnë!

    * Njohuritë e gjuhës së huaj duhet të jenë të certifikuara nga institucione publike ose nga subjekte të njohura nga ministria përgjegjëse për arsimin, për ofrimin e testeve ndërkombëtare. Nëse aplikanti ka fituar një diplomë të një programi studimi të kryer në këtë gjuhë, diploma e fituar shërben si dëshmi për plotësimin e këtij kriteri.